ഇനി നീ മറന്നിടൂ എന്നെ പകുതി പാടിയ പാട്ടെന്ന പോലെ ഉയിര് പാതി പകുത്തു ഞാന് നിന്നെ- യെന്റെ പ്രണയമായ് മോഹിച്ചതല്ലേ മിഴിനീരു പെയ്തുരുവായോരീ- ത്തെളിനീര്ത്തടാകത്തില് നോക്കി- യിരു കരയിലായ് നാം നില്ക്കെ, ഭദ്രേ നിന്റെയളകങ്ങള് മന്ത്രിക്കുമേതോ നഷ്ട ഗതകാല സ്വപ്നങ്ങള് കേട്ടോ ഈയലകളും ഗദ്ഗദമാര്ന്നൂ? ജന്മങ്ങള് തന് താഴ്വരയില് തെന്നല് മൂളുമൊരാര്ദ്ര ഗാനം നീ രാവില് നിലാനദിയോരം- ചേര്ന്നു പൂക്കും സുമങ്ങള് തന് ഗന്ധം ഓര്മ്മയില് പൂവിടുംപോല് നിന് - മുഗ്ദ്ധ ചാരുത സ്മൃതികളില് നിറയേ ഇന്നെന് പാനപാത്രം കവിഞ്ഞല്ലോ എങ്കിലുമോമലേ,യെന്തേ നമ്മളെല്ലാം വഴിയില് മറന്നൂ? നിശ്ശബ്ദ രാവിലിന്നങ്ങു- ദൂരെയേതോ വിരഹാര്ദ്ര ഗാനം ജാലകം തട്ടി വിളിക്കും മഴച്ചാറല്,പൊയ്പ്പോയ പ്രണയം ഇനി നീ വരൂ വീണ്ടുമിതിലേ,- യെന്റെ വാഴ്വിന്റെ പകുതിയായ് ഭദ്രേ
No comments:
Post a Comment